" పుణ్య (జన్మ)భూమి " (కవిత)

అక్కడ .....నేలంతా ,

పచ్చని తివాచీ పరిచినట్టు

నిత్యం నిగ నిగ లాడుతుంటుంది,

పొలాలన్నీ ...

పచ్చని పైరుతో

ఉయ్యాల లూగుతుంటాయ్ !

కార్మిక ..కర్షకులతో,

కష్టించి పనిచేసే కూలీలతో,

కోడికూతతో పనిలేకుండానే ,

తెల్లవారుతుందక్కడ !

మెట్టభూములన్నీ ...

నారికేళ వృక్ష సముదాయంతో

జిరాఫీల్లా ..తల పైకెత్తి ,

ఆప్యాయంగా ..

పలకరిస్తుంటాయ్ .

జీవితాంతం ..

జీవన భృతిని

అందిస్తుంటాయ్ !

గోదావరి గట్టు ....

గ్రామాలను ..పొలాలను ,

విడదీసే ఏటిగట్టు ..కు,

ఇరువైపులా ...

గుబ్బ గొడుగుల్లాంటి చెట్లు,

బాడీ గార్డుల్లా ...నిలబడి,

బాటసారులకు

మార్గదర్శనం చేస్తుంటాయ్ !

కష్టపడడం ఎలాగో ..

కష్టించి ...

తృప్తిగా బ్రతకడం ఎలాగో ,

క్రమశిక్షణగా జీవించటం ఎలాగో ,

సహజంగా నేర్పుతుంది

ఈ ప్రదేశం !

ఇదే ...నా ఊరు

నను గన్న ఊరు ..

నను పెంచి ..పోషించిన ఊరు ,

'దిండి '...దాని పేరు ..!!

_డా.కె .ఎల్ .వి.ప్రసాద్ ,

హనంకొండ