నా తో నడిచివచ్చిన దీపావళి...!! (కవిత)

పండుగలంటే ...

బాల్యాన్ని వెతుక్కుంటూ ,

వెనక్కి పరిగెత్తాలి ,

ఇంట్లో కనిపించని

పండగ వాతావరణం ,

బయట వెతుక్కున్న ,

గమ్మత్తు రోజులను

గుర్తు చేసుకోవాలి ,

ఇతరుల ఆనందంలోనించి ,

కొంతయినా గుంజుకుని ,

తృప్తి పడాలన్న ఆలోచనని

గుర్తు చేసుకుని ..

కాసేపైనా నవ్వుకోవాలి !

ఎప్పుడూ ...

గుర్తుండి పోయే ,

అతిముఖ్య మైన రోజు ,

దీపావళి ...!

బయట ..

రకరకాల కాంతులతో ,

గృహాలన్నీ ..

దేదీప్యమానంగా ..

వెలిగిపోతూంటే ,

మా ఇల్లు ..

గుడ్డి దీపాలతో

మబ్బు ..మబ్బు గా ,

కనిపించేది ...!

పేదరికం ..

వామపక్ష భావజాలం

చేయి ..చేయి కలుపుకుని ,

మా బాల్యాన్ని ,

వెక్కిరిస్తూ కనిపించేవి ,

దానికీ ..దీనికి ..

అర్థం తెలియని

మా పసి మనసులు ,

ఆ ..టపాకాయలవైపు ,

గురి పెట్టి చూసే వి ..

నిరాశ తో ..

నివాసాలకు మళ్ళేవి !

సంస్కృతి ..సంప్రదాయం

అని _కాదుగానీ ...

నా ..సమస్యను ,

నాపిల్లల దరిచేరనివ్వలేదు !

కానీ ...ఇప్పటికీ ..

దీపావళి వచ్చిందంటే ,

ఆ ..బాల్యమే గుర్తుకొస్తుంది ,

టపాకాయల సంబరం ..

క్రమంగా చల్లారిపోయింది ,!

అప్పుడు చూసి సంతోషించిందే ,

ఎంతో నయమనిపిస్తుంది !!

_డా.కె .ఎల్.వి.ప్రసాద్ ,

హనంకొండ .